Номиналы 500 ₸, салмағы 31,10 г күміс монета арқар бейнесіне арналған. Арқар — ежелгі көшпенділер өнеріндегі айрықша мәнерлі образдардың бірі. Монетаның безендірілуінде жануардың шапшаң, қалықтап бара жатқандай екпінді шабыс үстіндегі бейнесі пайдаланылған. Композиция Алматы облысы Кеген ауданындағы Жалаулы қонысында жүргізілген археологиялық қазба жұмыстары кезінде табылған алтын бұйым негізінде жасалған. Бұл олжа б.з.д. VIII–VII ғасырларға жатады және ерте далалық аң стиліне тән белгілерді көрсетеді. Бұл стильде қозғалыс, күш пен пластика ерекше айқын берілген. 925 сынамалы күмістен соғылған монета Қазақстанның ежелгі көшпенділерінің көркем мұрасы тақырыбын жалғастырып, қазіргі нумизматика мен сақ дәуірінің ескерткіштері арасындағы байланысты танытады. Арқар бейнесі өткеннің мәдени нышандарын сақтап, оларды жаңаша пайымдауға мүмкіндік беретін археологиялық жаңалықтардың маңызын айқындай түседі.
